Girlie nangusog mapalapdan kampanya pag-abag sa mga PWDs


Gikahingawa ni Konsehal Girlie Balaba, chairman sa komite sa social services, nga 15 lamang sa 80 ka barangay sa syudad ang misalmot sa gipahigayong Search for Most PWD-Friendly Barangay karong tuiga.

Kini human nagtigom ang iyang komite ug mituki sa kampanya pagpalapad sa serbisyo nga gitunol sa kagamhanan ngadto sa mga Kagay-anong adunay kabilinggan sa panglawas ug pangutok kon Persons with Disability (PWDs).

Nasayran nga misalmot sa maong kalihokan ang Barangay 14, 35, Iponan, Bulua, Patag, Canitoan, Lumbia, Mambuaya, Gusa, Lapasan, Bugo, Cugman, Camama-an, Nazareth ug Puntod nga nagsugod sa Nobyembre 16-25, 2022.

Gikinahanglan gyud unta ang partisipasyon sa tanang barangay aron matunol ang mga batakang serbisyo ug suporta ingon man makuha ang tukmang datus sa ilang mga PWD.

Sa susamang higayon, ang representante sa CSWD mibutyag nga sa tuig 2019-2022 adunay 6,621 ka rehistradong PWD sa syudad ug niini, 1,123 ang na-classify nga mga kabus ug sa kasamtangan padayon ang buhatan sa pagpahigayon og validation sa mga na-enroll nga mga PWD.

Nunot niini, si Balaba mihangyo ni Mayor Klarex Uy pagpagawas sa Executive Order nga magmando sa tanang barangay pagsalmot sa gilusad nga Search for Most PWD-Friendly Barangay sa sunod tuig 2023.