top of page

Girlie mihangyo sa pagsabot sa katawhan dihas pagpatuman sa mga proyekto

Hugot nga gihangyo ni Konsehal Girlie Balaba ang pagsabot sa katawhan sa gamay’ng kahasol nga dala sa pagpatuman sa mga proyekto sa imprastraktura dinhi sa dakbayan. Mao kini iyang panawagan atol sa sesyon sa konseho niadtong Lunes nga gidumala ni Bise Mayor Bebot Rodriguez human si Konsehal John Michael Seno mitaho kalabot sa kapiot nga dagan sa trapiko dinha sa Puerto National Highway.


Si Balaba mipasabot nga alang sa kaugmaran sa dakbayan ang proyekto ug kun matibawas makatabang kini aron mapagaan ang dagan sa trapiko dinha sa maong highway.


“Dili man seguro dugay ang pagtrabaho dinha. Ang ato lang angayang masayran gikan sa DPWH kun hangtod kanus-a ang proyekto. Unta, ilang paspasan ug dalion ang pagtrabaho aron dili dugay ang inconvenience nga masinati sa katawhan sa esteng bahin sa syudad,” pamahayag sa konsehal.


Siya midugang nga ang mga proyektong gipatuman sa DPWH moagi man sa panugot sa congressional district ug segurado nga adunay pahibalo ngadto sa katawhan kalabot sa pagpatuman sa trabaho. Apan gikahingawa sa konsehal ang kakulangon sa koordinasyon tali sa DPWH, kontraktor sa proyekto ug sa lokal nga kagamhanan.


“Unta malikayan kini sa umaabot nga mga proyekto”, panawagan ni Konsehal Girlie Balaba.

Comentarios


bottom of page