Gireklamong parking space sa Limketkai gisusi

NAG-UNA sa gipahigayong inspeksyon niadtong Huwebes sa hapon sa Limketkai Mall parking space ang komite sa public utilities in Konsehal Eric Salcedo.  

Ang maong inspeksyon may kalabotan sa special report ni Konsehal Roger Abaday sa miaging sesyon sa konseho mahitungod sa giingong sulat nga nag-viral sa social media nga nagpaabot  sa  mulo ngadto sa kadagkoan sa establisamento tungod  sa giingong  limitado  nga parking space sa  ilang mga kliyente.

Gitumbok niini ang mga masitasan nga gipahimutang tunga sa dalan hinungdan nga gakapugngan ang mga kliyente sa pagparada sa ilang sakyanan ug mapugos nalang kini  nga moadto sa pay parking slots.

Gawas niini, buot usab nga masuta sa konsehal kon kini  mituman ba sa nahilatid sa building code.

Lakip sa nikuyog sa maong inpeksyon ang buhatan sa Building Official, City Legal Office ug Roads and Traffic Administration.

Ang komite gipaabot mopatawag og tigom aron hisgotan ang obserbasyon atol sa maong inspeksyon aron makaluwat kinig tukmang aksyon ug rekomendasyon. (JRG/SP)