Giingong mga tinun-ang walay birth certificate tun-an sa komite ni Daba

GIPAABOT nga konsiderahon sa komite sa edukasyon ubos ni Konsehal Suzette Magtajas-Daba ang giingong mga tinun-an sa Bulua National High School-Patag Annex  ug sa  Camp Evangelista Elementary School nga hangtod karon nagtungha nga walay mga birth certificate.

Mahinumdoman nga kini ang unod sa special report ni Konsehal Romeo Calizo atol sa miaging sesyon sa konseho nga gidumala ni Bise Mayor Rodriguez human sa pakisusi sa konsehal nga lisod makakuha og birth certificate sa buhatan sa Local Civil Registrar ug sa Philippine Statistics Authority (PSA) ilabina kon late registration.

Gikahingawa ni Konsehal Suzette ang kakulangon sa birth certificate tungod kay usa kini sa pinaka importante nga dokumento sa ilang pag-eskwela ug magamit sa lainlaing katuyoan.Niini, gilauman sa konsehal nga makatambong ang mga hintungdang ahensya sa umaabot nga tigom aron mahatag kanila ang solosyon, tukmang proseso ug aksyon. (RNQuiblat/SP)