Gaane misugyot sa grupo sa kooperatiba pagsomite sa ilang position paper

GISUGYOT sa komite sa cooperative sa konseho ngadto sa grupo sa mga kooperatiba ang pagduso sa ilang position paper mahitungod sa mga regulatory fees nga kasamtangang gipahamtang sa syudad ngadto kanila.

Kini human ang komite, sa tigom niadtong Mierkoles nga gidumala ni Konsehal Malou Gaane, midapit sa mga representante sa nagkalain-laing kooperatiba.

Sa maong tigom daghang mulo ug sentemento ang gipresentar sa CDA ug sa mga kauban niining kooperatiba mahitungod sa regulatory fees nga ilang gabayaran atol sa renewal sa business permit matag tuig labina gayud sa hisgutanan sa garbage fee.

Matod nila nga wala silay supak sa regulatory fee ang importante nga makiangayon lang ang ilang pagabayaran ug adunay igong basihan.

Giklaro usab nila nga dili makiangayon nga ibasi matod sa ilang Net Surplus ang pagbayad sa garbage fee tungod kay wala nagpasabot nga kon dako ang net plus dako usab ang ilang kinitaan gawas pa nga adunay uban nga gamay ra gayud ang ilang basura.

Gipasabot ni Gaane nga iyang nasabtan ang mulo sa mga kooperatiba og aron nga mapaminaw ug makonsidera ang ilang mga suhestyon, gisugyot niini ang pagduso og position paper sa konseho aron kini ma-review ug mahisgotan aron mapangitaan sa hingpit nga solusyon.