Fact finding team padayong imbestigahan problema sa panubig

MAGPADAYON sa ilang imbestigasyon ang fact finding team nga gimugna sa Task Force for Water Supply and Distribution sa nasinating problema sa panubig sa syudad.

Kini ang gibutyag ni Konsehal James Judith, Chairman sa Komite sa Arbitration, nga  mao usab ang nangulo  sa maong  team.

Gipasabot sa konsehal nga ang tubig usa sa pinakaimportanteng gikinahanglan sa komunidad maong nabalaka siya sa epekto niini sa kasamtangang problema tali sa Cagayan de Oro Water District (COWD) ug Cagayan de Oro Bulk Water Inc. (COBI).

Mahinumdoman nga sa gipahigayong initial nga pakisusi aduna silay nadungog nga katin-awan apan aduna usay  nasil-ip  nga kahiwian.

Niini, gihingusgan ni Konsehal Judith nga magpadayon ang maong imbestigasyon aron matagaan sa tukmang solusyon ang maong problema sa labing dali nga  panahon  aron  dili na maglisod sa supply sa tubig ang katawhan sa dakbayan.