Esparcia miawhag sa plastar nga pagpamaligya dihas Cogon

SUPORTADO ug walay supak si Konsehal Bernie Esparcia sa mga gagmayng negosyante nga namaligya og ukay-ukay diha merkado sa Cogon.

Kini ang unod sa special report sa konsehal sa sesyon sa konseho niadtong Lunes nga gidumala ni Bise Mayor Jocelyn Rodriguez.

Matod sa konsehal nga nalipay siya nga sa duha ka tuig nga milabay nakabalik na ang ekonomiya sa syudad ug nakapamaligya na ang gagmayng negosyante apan gusto lang niya nga maplastar ang mga mamaligyaay kay adunay mga dalan nga wala masira og makaagi gihapon ang mga salakyan.

Mahinumduman nga niadtong Sabado, naaktohan sa konsehal atol sa ilang pagpamalit ang pagbangga sa usa sakyanan ngadto sa motorsiklo nga nakahatag og pelegro sa katawhan.

Tungod niini, gihangyo ni Konsehal Esparcia ang hintungdang komite sa konseho nga mabisita pag-usab ang traffic scheme sa dapit aron mahatagan kapasiguroan ang mga mamalitay ug mamaligyaay.