Engr. Malinao gipahalipayan sa Konseho

GIPAHALIPAYAN sa Konseho sa Syudad ubos ni Bise Mayor Bebot Rodriguez si Engr. Carl Vincent P. Malinao sa Xavier University-Ateneo de Cagayan.

Atol sa sesyon niadtong Lunes nga gidumala ni Presiding Officer Pro Tempore Councilor Roger Abaday, hiniusang gisagop sa Konseho ang resolusyon nga nagpahalipay ug nagdayeg kang Engr. Carl Vincent P. Malinao sa Xavier University-Ateneo de Cagayan sa iyang nasungkit nga 1st Place sa Electronics Engineering Licensure Examination (EELE)  ug 3rd Place sa Electronics Communication Technician (ECT) Licensure Examinations nga gipahigayon niadtong Marso 2026.

Nasayran nga si Carl Vincent Malinao, migradwar isip Summa Cum Laude sa Electronics Engineering sa maong tunghaan ug nahimong solo topnotcher sa 1,692 nga nakapasar sa EELE.

Ang iyang pagkugi, paglahutay, dedikasyon ug pagkamaayo maoy testamento sa iyang talagsaon nga kalamposan.

Si Konsehal Christopher George Goking, chairman sa komite sa trade and commerce ug nangamahan sa gisagop nga resolosyon, miingon nga ang maong kalamposan ni Engr. Malinao naghatag og dakong garbo sa dakbayan. (RNQ/SP)