Emano misugyot madugangan pundo sa ayuda sa mga hamtong

GIHINGUSGAN ni Konsehal Yvy Emano, chairman sa komite sa arbitration, nga madugangan ang pundo nga gitagana alang sa ayudang pinansyal sa mga hamtong.

Kini human nasayran sa konsehal atol sa milabayng tigom sa komite sa senior citizens ni Konsehal Roger Abaday, nga aduna pay mokabat sa 5,743 ka mga miembro sa kapunungan sa mga hamtong nga naka waitlisted sa City Social Welfare Department (CSWD) ug nagpa-abot pa nga masukip sa alokasyon sa gobyerno.

Unta malakip sa budget proposal sa opisina sa CSWD ang dugang mga hamtong aron makadawat usab sa local pension gikan sa kagamhanang local, dugang ni Emano.

Matod niya nga mas maayo nga dugangan ang pundo nga igahin aron daghan ang matabangan nga mga hamtong ilabina kadtong mga kabus nga nagkinahanlan sa tabang sa gobyerno aron makapalit sa mga panginahanlan sama sa tambal ug medisina.

Andam akong magpaluyo sa sugyot nga budget sa CSWD alang sa pagpatuman sa mga programa nga maglambigit sa mga hamtong tungod kay dako ang ilang nahimong papel sa pag-angkon sa kaugmaran sa dakbayan, panapos ni Konsehal Yvy Emano. (SP/MLRapanot)