Edukasyon makahaw-as sa kapobrehon- Suzette

EDUCATION is a great equalizer, the most effective tool to break the cycle of poverty.”

Kini ang gibarogan ni Konsehal Suzette Magtajas-Daba, chairman sa komite sa edukasyon, atol sa 1st CSWD Women’s Series FB Live Talk Show nga nagpasundayag sa City Scholarship Program sa dakbayan.


Gitumbok sa konsehal nga laing hugna na usab sa mga Kagay-anong kabataan ang makapahimulos sa maong programa alang sa tuig 2021.


Mapasigarbuhon ang konsehal nga taliwala sa pandemya nga gisagubang sa kalibutan ang kagamhanan sa dakbayan wala nagpaapekto apan nagpadayon paghatag og prayoridad sa natad sa edukasyon.


Dinhi makita ang kalig-on sa atong gobyerno kay karong tuiga mialokar gihapon og kapin P200 milyones aron dili maputol ang access sa edukasyon kay isa kini sa mga paagi nga makab-ot ang damgo nga kaarangan sa kinabuhi sa kabataan, pamahayag sa konsehal.


Niini, gipasalamatan ni konsehal Suzette ang tanang partner schools sama sa Xavier University, Liceo de Cagayan University, Lourdes College, Pilgrim Christian College, Capitol University, University of Science and Technology of Southern Philippines (USTP) ug Systems Technology Institute (STI) sa dakong tabang sa programa sa syudad.


Siya miaghat sa kabataan ilabina sa mga mosulod sa kolehiyo pagpahimolos sa maong programa.

Ang akong paglaum nga unta dili na nato mapasa ang kalisod sa sunod nga henerasyon kay importante kaayo ang edukasyon nga makahaw-as sa kapobrehon, panapos ni konsehal Suzette Magtajas-Daba. (SP/RNQuiblat)