Dugang sakop sa komite sa ethics giuyonan sa konseho

GIUYONAN sa konseho sa syudad atol sa sesyon sa Lunes nga gidumala ni Bise Mayor Bebot Rodriguez ang resolusyon nga nagpili nila ni Konsehal Al Legaspi, Sr. ug Kenneth John Sacala isip dugang mga sakop sa komite sa ethics and blue ribbon.

Ang komite maoy gitahasan sa pag-imbestigar sa mga kaso batok sa mga opisyal sa barangay nga nalambigit sa graft and corruption, irregular o anomalous nga transaksyon, ug uban pang mga paglapas sa balaod.

Niini, ang konseho mi-amendar sa Resolusyon No. 15422-2025 nga naglangkob sa komposisyon sa mga komite.

Mahinumdoman nga ang konseho misagop usab og resolusyon nga naghatag og pagtugot sa chairman sa mga komite pagdugang sa ilang mga sakop ubos sa kompirmasyon sa tibouk konseho.

Ang resolusyon nga gisagop sa konseho alang sa maong katuyoan gipaluyohan ni Konsehal Edgar Cabanlas, chairman sa komite sa ethics and blue ribbon. (RNQ/Photo by JRG/SP)