top of page

Dugang pagtuki sa isyu sa doluna sa Puntod, Macabalan gitakda

GITAKDANG ipahigayon sa umaabot Septembre 22, 2023 ang dugang pagtuki sa isyu sa doluna tali sa Barangay Puntod ug Macabalan.


Kini human nagtigom sa milabayng semana ang Komite sa Arbitration ni Konsehal James Judith II ug mituki sa reklamo ni Kapitan Norbel Saa sa Barangay Macabalan kabahin sa problema sa doluna sa iyang barangay ug Puntod.


Sa maong tigom, si Judith miawhag sa matag panig pagsumete sa mga dokumento nga magpamatuod sa tukmang doluna sa duha ka barangay.

Dugang niini, si Engr. Ban Mikhael Pacuribot sa buhatan sa Department of Environment and Natural Resources (DENR) misugyot pagsusi sa dokumento gikan sa COMELEC kalabot sa voters’ registration sa mga molopyo sa gitumbok nga doluna. Angayang masusi usab ang nahimutangan sa Police Station sa Macabalan nga matod pa giingong sakop sa Puntod.


Hinuon, si Atty. Gil Banaag, abogado sa Macabalan Barangay Council, mipasabot nga sa pagsusi sa tukmang doluna angayang balikan ang ordinansa sa mga utlanan sa duha ka barangay gikan sa tuig 1960, 1999 ug 2004.


Ang tigom gitambongan sa mga representante sa buhatan sa City Administrator, City Legal, City Assessor, City Planning and Development ug DENR-10 uban nila ni Kapitan Norbel Saa sa Macabalan ug Kapitan Rexie Tinampay sa Puntod.

Comentários


bottom of page