Dugang mga programa ug proyekto sa Brgy. Lumbia mapatuman na

HAYAN mapatuman na sa Barangay Lumbia ang ilang dugang mga programa ug proyekto alang karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa sa barangay nga may kalabotan sa ilang Supplemental Budget No. 1 nga adunay gibana banang kinitaan ug galastohon nga mobalor P1,718,422 alang sa implementasyon.

Lakip sa gipundohan sa maong budget ang personal services ug maintenance & other operating expenses ug uban pang mga programa nga gilantaw’ng maghatag og dugang kaarangan sa serbisyo nga matunol ngadto sa mga lomolopyo sa barangay.

Si konsehal Yan Lam Lim, chairman sa komite sa Barangay Affairs miingon nga hugot niyang gisuportahan ang maong lakang human nakita nga nahisubay sa balaod ug dako ang ikatabang alang sa kalamboan sa barangay gawas nga miagi kini sa makuting pakisusi og deliberasyon sa mga hintungdan komite.

Ang resolusyon nga gipalabang sa konseho alang sa maong katuyoan gipaluyohan usab sa komite sa pamalaod ug reglamento ubos ni Konsehal Ian Mark Q. Nacaya.