Dugang kalamboan sa natad sa turismo gilantaw sa 2022

KAPIN sa P11.40 milyones ang gisugyot nga gahin alang sa pagpatuman sa mga programa ug proyekto nga maghatag og dugang kalamboan sa natad sa turismo sa umaabot tuig 2022.

Ang maong laraw nasukip sa 2022 Executive Budget ni Mayor Oscar Moreno nga gisumete dinha sa konseho sa dakbayan ubos ni Bise Mayor Kikang Uy.

Lakip sa mga proyektong gisugyot mapundohan mao ang pagtukod og tourism facility sama sa shower, changing room, rest room ug souvenir shops diha sa Barangay Dansolihon, Tagpangi, Balubal ug Tuburan nga mobalor og P1.5 milyones.

Gisugyot usab nga magahinan og pundo ang pagtukod og basic facility diha sa barangay Tablon ug Guadalupe Pilgrimage Destination nga mobalor og tag-P1 ka milyon.

Ipatuman usab ang ecotourism livelihood program alang sa mga molopyo sa natumbok nga ecotourism destinations sa syudad nga adunay gisugyot nga gahin balor P500 mil.

Si Konsehal Jay Roa Pascual, chairman sa komite sa turismo, malaumon nga ang maong gisugyot nga mga proyekto magdala sa dugang kaarangan sa turismo sa syudad.