Dugang ekipo madawat sa mga mag-uuma


Padayong naninguha ang konseho sa syudad ubos ni Bise Mayor Bebot Rodriguez nga mahatagan sa dugang kaarangan ang kinabuhi sa mga mag-uuma sa dakbayan.

Lakip sa maong lakang mao ang pagpalabang sa balaodnon nga maghatag og panugot sa paglagda sa dakbayan og Memorandum of Agreement (MoA) tali sa Department of Agriculture – Regional Field Office 10 alang sa gitanyag nga lain laing ekipo nga magamit sa mga mag-uuma dinha sa ilang kapanginabuhian.

Ang maong mga ekipo naglangkob sa Vacuum Pack Sealer nga itunol pabor sa lokal nga kagamhanan; 4WD tractor nga itunol pabor sa Balubal Integrated Social Forestry Farmers Association Inc.; Egg Incubator, Forage Chopper, Hammermill ug Organic Shredder nga dawaton sa AMIA (Adaptation and Mitigation Initiative in Agriculture) Village–Guinitan Upland Farmers Association (GUFA).

Ang gisugyot nga MOA gipaabot hisgutan sa komite sa agrikultura ni Konsehal Jay Pascual.