Drug-free workplace ordinance sa Lapasan giaprobahan sa Konseho

MAPATUMAN na ang Drug-free Workplace Ordinance sa Barangay Lapasan, ning syudad. Kini human ang Konseho sa sesyon kagahapon nga gidumala ni Bise Mayor Bebot Rodriguez hiniusang  nagpalabang  og resolusyon  nga nagdeklara nga mahimo nang ipatuman ang maong ordinansa ug naggahin og igong pundo alang sa maong katuyoan.

Ang lehislatibong lakang alayon sa Executive Order No. 66 nga giluwatan ni kanhi Presidente Rodrigo Duterte nga nanawagan alang sa pag-institutionalize sa Philippine Anti-Illegal Drugs Strategy aron makab-ot ang balanse nga paningkamot sa gobyerno  sa kampanya  kontra druga.

Nahilatid usab sa section 4 sa maong order nga kinahanglan nga ang tanang local nga kagamhanan mosagop sa ilang tagsatagsa ka drug-free workplace programs ug sa pagpahigayon sa drug test sa ilang mga opisyales ug empleyado.

Ang resolusyon  nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlou Tabac ug komite sa pamalaod ug reglamento ubos ni Konsehal Ed Cabanlas. (JRG/SP)