Drug-free workplace assessment committee sa Nazareth gisuportahan sa Konseho

MAS mahugtan pa karon sa Barangay Nazareth ang kampanya batok sa illegal nga druga.

Kini human ang konseho sa sesyon niadtong Lunes nga gidumala ni Presiding Officer Pro Tempore Konsehal Roger Abaday nisagop og resolusyon nga nagdeklara nga mahimo nang ipatuman ang resolusyon sa maong barangay nga nagmugna sa drug-free workplace assessment committee subay sa City Ordinance No.13292-2017 nga nagpromote sa drug-free workplace sa dakbayan sa Cagayan de Oro pinaagi sa pagpahigayon og mandatory drug test sa tanang opisyal ug empleyado sa  kagamhanang lokal.

Gipasabot sa barangay nga ang pagmugna sa maong komite magsilbi isip local body nga maoy magplano, mag-implementar, ug mag-evaluate sa tanang programa ug kalihokan nga may kalabotan sa pag-promote ug pagmintinar sa drug-free workplace.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa palamaod ug reglamento ubos ni Konsehal Edgar Cabanlas. (JRG/SP)