Donasyon sa PFI giuyonan sa Konseho

DUGANG kalamboan ang matagamtaman sa kabataan sa dakbayan sa Cagayan de Oro.

Sa ilang sesyon nga  gidumala ni Bise Mayor Bebot Rodriguez, hiniusang  gipalabang sa Konseho ang ordinansa nga naghatag  katungod ni Mayor Klarex Uy sa pagpirma sa Deed of Donation and Acceptance (DODA) tali sa Philseven Foundation Inc. (PFI), nga girepresentahan ni Chairman Jose Victor P. Paterno.

Kini naglangkob sa donasyon sa usa ka pasilidad sa dulaanan (mobile-day-care facility) ubos sa panguna sa City Social Welfare and Development Department (CSWD).

Ang maong pasilidiad magamit sa pagsiguro nga ang programa sa edukasyon makaabot ngadto sa komunidad nga nagkinahanglan sa maong serbisyo ug nagtanyag ngadto sa mga bata sa oportunidad sa pagkat-on ug paglambo samtang nagsuporta sa nagtrabaho nga mga ginikanan.

Tipik sa  nakalatid sa DODA nga ang kagamhanan mao ang maghatag og dapit, husto nga pagdumala ug pag-ayo, panalipod sa bisan unsang pagkadaot ug pagmintinar sa maong community playground facility.

Samtang ang PFI mao ang mag-instalar sa playground facility ug magpahigayon og periodic monitoring sa pagpatuman sa maong proyekto. (RNQuiblat/SP)