Donasyon sa mga libro sa CdO City College giuyonan

GILANTAW ang dugang kalamboan sa mga tinun-an sa Cagayan de Oro City College.

Sa ilang sesyon niadtong Lunes nga  gidumala ni Bise Mayor Bebot Rodriguez, hiniusang  gipalabang  sa Konseho ang ordinansa nga naghatag katungod ni Mayor Klarex Uy sa pagpirma sa Deed of Donation and Acceptance (DODA) tali sa Latter-Day Saint Charities-Philippines, Inc. (Donor), nga girepresentahan ni Country Director Anthony John Balledos, ug sa City College of Cagayan de Oro nga girepresentahan sa Presidente niini, Dr. Jestoni P. Babia.

Kini naglangkob sa donasyon sa mga libro ug teknikal nga kagamitan alang sa City College lakip na ang one-time cash grant.

Ang maong donasyon nakasubay sa Safety, Security and Human Development component sa RISE Agenda sa kagamhanan diin ang edukasyon gihatagan sa igong pagtagad.

Ang maong kasabutan nagtinguha nga mahatagan sa gikinahanglang teknikal nga ekipo ug mga materyales sa pagbasa ang library sa City College aron magamit sa mga estudyante niini. (RNQ/SP)