Domingo Velez Street himoong evacuation center sa Barangay 29

GIDEKLARA sa konseho atol sa ilang regular session nga  gidumala ni Presiding Officer Pro Tempore Councilor Roger G. Abaday nga "operative" o epektibo ang ordinansa sa Barangay 29 nga nagtumbok isip opisyal nga pick-up point ug evacuation area sa barangay ang dalang Domingo Velez panahon sa mga kalamidad.

Sa maong ordinansa usab, gitugotan ang temporaryo nga pagsirado sa maong dalan panahon sa mga earthquake drill.

Sumala sa maong barangay, sila ang usa sa labing daling maigo sa mga kalamidad, hinungdan nga dako gayod ang ilang panginahanglan niini tungod kay sa kasamtangan wala silay permanenteng evacuation center.

Nasayran nga ang maong ordinansa nasusi na usab sa City Legal Office diin ilang girekomendar nga  usbon o i-revise ang pipila ka bahin niini aron makasubay sa technical findings ug rekomendasyon sa City Disaster Risk Reduction and Management Department ug Roads and Traffic Administration.

Ang maong resolusyon gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Edgar Cabanlas. (JRG/SP)