DODA sa pag-instalar sa solar study shed sa CdO City College Campus giuyonan

GILANTAW ang dugang kalamboan nga matagamtaman sa mga tinun-an sa Cagayan de Oro City College.

Sa ilang sesyon niadtong Lunes  nga  gidumala ni Bise Mayor Bebot Rodriguez. hiniusang  gipalabang  sa Konseho ang ordinansa nga naghatag katungod ni Mayor Klarex Uy pagpirma sa Deed of Donation and Acceptance (DODA) tali sa Mindanao Goes Solar Movement pinaagi sa Professional Organizers Unlimited, Inc. (PROFORG), (Donor).

Kini naglangkob sa donasyon sa usa ka solar study shed diha sa City College aron magamit sa mga estudyante niini.

Subay usab kini sa Regional Leadership: Metropolization, Accessibility, and Connectivity component sa RISE agenda sa kagamhanan diin ang kabag-ohan ug panukiduki gihatagan sa igong pagtagad.

Ang maong kasabutan nagtinguha sa pagpalambo sa paggamit sa renewable energy ug kabahin sa global nga pagbalhin ngadto sa pagkamalahutayon ug responsibilidad sa kinaiyahan.

Ang panagtambayayong nagtumong usab sa pagpadali sa pag-instalar sa mga sistema sa solar energy ug ang pagpalambo sa mga programa diin makaapil ang mga magtutudlo, mga estudyante ug mga miyembro sa komunidad diha sa mga renewable energy practices. (RNQuiblat/SP)