Derby dihas Indahag Square Garden karong Hunyo-5-2026 gihatagan panugot sa Konseho

MAYORIYANG giuyonan sa konseho sa syudad atol sa ilang sesyon niadtong lunes nga gidumala ni Bise Mayor Bebot Rodriguez ang aplikasyon sa Indahag Square Garden alang sa ilang 1-day 5-Bullstag/Cockfight Derby karon umaabot Hunyo 5 ning tuig.

Kini human ang tigdumala sa maong bulangan nga si Engr. Alvin Biton nakaduso sa tanang gikinahanlang rekisitos alang maong matang sa operasyon subay sa balaod sa syudad.

Samtang nakisayod si Konsehal Aga Suan sa petsa sa maong Derby nga wala matunong sa adlawng dominggo nga maoy nalatid sa balaod ubos sa PD 449.

Niini gipasabot ni Konsehal Moreno Daba, chairman sa komite sa games and amusement, nga ubos sa ordinansa sa syudad gitugotan na ang pagpahigayon sa derby pinaagi sa special permit sa ordinaryong adlaw kausa sa usa ka bulan.

Nunot niini mayoriyang giuyonan ang ordinansa nga gipalabang sa konseho alang sa nasangpit nga katuyuan gipaluyohan sa komite sa games and amusement ni Konsehal Daba ug sa komite sa pamalaod ni Konsehal Edgar Cabanlas. (MLR/SP)