De-clogging sa mga kanal gipundohan sa Brgy Carmen

GILANTAW sa Konseho sa Barangay Carmen nga mahatagan og kasegurohan ang ilang katawhan panahon nga adunay pagbaha sa ilang dapit.

Kini human ang Konseho sa Syudad atol sa sesyon niadtong Lunes nga gidumala ni City Vice Mayor Bebot Rodriguez hiniusang misagop sa resolusyon nga nag-aprobar sa ordinansa sa maong barangay nga may kalabotan sa ilang 2026 Annual Budget nga adunay bana-banang kinitaan ug galastohon  nga mokabat sa P128,053,275.

Gihatagan og prayoridad ang de-clogging sa mga kanal nga may gahin nga P9 milyones kay kini ang nakit-an sa barangay isip pinakadali nga solusyon sa pagpugong sa baha sa dapit.

Gigahinan usab ang pag-instalar og mga suga nga mobalor P4.5 milyones aron adunay kahayag panahon sa gabii ug mamentenar ang kahusay ug kalinaw sa tibook komunidad.

Lakip usab sa gihatagan og igong pundo ang pagpangandam panahon sa kalamidad, mga programa alang sa pagpalambo sa kabatan-onan ug uban pa nga gilantawng maghatag og dugang kalamboan sa kinabuhi sa katawhan sa barangay. (RNQ/SP)