2026 annual budget sa Agusan giuyonan sa Konseho

HINGPIT nga kalamboan ang gipaabot matagamtaman sa katawhan sa Barangay Agusan ning dakbayan sa sunod tuig 2026.

Kini human ang Konseho sa sesyon niadtong Martes nga gidumala ni Bise Mayor Bebot Rodgriguez misagop og resolusyon nga nag-uli sa ilang Ordinansa nga may kalabotan sa ilang 2026 Annual Budget nga adunay gibana-banang kinitaan ug galastohon nga mokabat sa P32,189,308.

Tipik sa mga proyekto nga ilang gihatagan sa prioridad nga ipatuman mao ang pag-instalar ingon man pagmintinar og solar street lights sa kadalanan, pag-abli og dalan diha sa Zone 1 ngadto sa Zone 7, pagtukod og drainage system, pagrehabilitar sa koral sa ilang parke, pagrehabilitar sa multi-purpose hall ug drainage system.

Dutong niini, migahin usab ang barangay og igong kantidad alang sa pagrehabilitar sa publikong pansayan, TB DOTS, Daycare Center sa Zone 2 ug Zone 7, pagpalit og garbage truck ug paghinlo sa mga canal ug drainage sa ilang mga zona.

Ang maong budget miagi sa makuting pagtuon ug deliberasyon sa mga hintungdang komite sa Konseho ug nasuta nga mahimo nang ipatuman sa labing  dali nga panahon.

Ang resolusyon nga gipalabang alang sa maong katuyoan gipaluyohan sa komite sa barangay affairs ni Konsehal Marlou Tabac ug komite sa pamalaod ug reglamento ubos ni Konsehal Ed Cabanlas. (JRG/SP)