Dalan dihas Bulua gipadeklarang No Parking area

UBOS sa konsiderasyon sa Komite sa Roads and Traffic Management ni Konsehal Romeo Calizo ang hangyo sa Konseho sa barangay Bulua nga madeklarang no parking area ang Inabanga Street, Zone 1 sa barangay.

Kini human mireklamo ang mga residente sa dapit sa mga nakaparadang sakyanan sa mga nanag-iya og establisamento, staff ug kliyente sa mga natukod nga patigayon kilid sa maong dalan ug nahimo na kining public parking area.

Giingon nga ang maong kalihokan nakaapekto sa mga molopyo sa dapit tungod kay maglisod na sila pagsulod ug gawas kay piot na ang dalan gumikan sa mga nakaparadang sakyanan sa wala ug tuong bahin niini.

Nanghinaut ang mga opisyal sa barangay nga masolosyonan ang ilang gipadangat nga mulo ilabina nga ang mga molopyo sa dapit ang nagdonar og bahin sa ilang mga lote aron matukod ang maong Inabanga Street.