Dahay gitudlong ambassador of goodwill ngadto’s USA

ANG konseho sa syudad ubos ni Bise Mayor Bebot Rodriguez hiniusang mitudlo ni Ritchel Petalcorin-Dahay nga Ambassador of Goodwill ngadto sa Estados Unidos (USA).

Kini human gisagop sa konseho ang resolosyon alang sa maong katuyuan.

Si Konsehal Suzette Magtajas-Daba, chairman sa komite sa edukasyon, mibutyag nga si Dahay usa sa 13 ka Pinoy nga napili ubos sa Society Institute of the Young Southeast Asian Leaders Initiative Professional Fellows Program (YSALIPFP) nga gipasiugdahan sa United States Department of State Bureau of Educational and Cultural Affairs.

Ang adbokasiya ni Dahay ang paghatag og gahum sa kabatan-onan ug maayong panggobyerno ang naghimo kaniya nga talagsaon gikan sa 1,400 ka aplikante sa tibuok Southeast Asia nga makaadto sa Atlanta City Georgia, USA.

Isip hepe sa buhatan sa City Scholarship, si Dahay gihatagan og katungod nga mag-obserbar sa mga modernong pamaagi sa natad sa edukasyon sa dapit ug gipasundayag nga mga programa ug palisiya, kalamboan sa edukasyon ug uban pa ug dalhon dinhi sa syudad ang tanang makat-onan ug masinating programa nga posibleng masagop sa dakbayan sa natad sa edukasyon.

Gihatagan usab si Dahay og katungod nga mapalambo ang panag-igsoonay tali sa dakbayan sa Cagayan de Oro ug Atlanta City, Georgia alang sa umaabot nga pagbayloay sa pagkat-on ug panag-uban ilabina sa pagpalapad sa programa sa edukasyon.

Ang resolosyon nga gisagop sa konseho alang sa maong katuyoan gipaluyohan nila ni Konsehal Suzette Magtajas-Daba, Malou Gaane, George Goking, Jay Pascual ug Imee Rose Moreno. (SP/RNQuiblat)