Daba uyon mapanumbalik na pipila ka probisyon sa House Rules sa Konseho

DILI supak si Konsehal Reuben Daba, chairman sa komite sa Blue Ribbon and Ethics, kun ipatuman na sa hingpit ang probisyon sa House Rules sa Konseho ilabina na ang pagsuot sa official attire ug pagkansela sa virtual attendance atol sa ilang mga sesyon.

Kini ang gipadayag sa konsehal sa sesyon sa Konseho niadtong Lunes nga gidumala ni Bise Mayor Kikang Uy human gisagop ang resolusyon nga nagpanumbalik sa probisyon sa House Rules nunot sa deklarasyon sa IATF nga nagpaubos sa syudad ngadto sa Level 1 Category.

Matod ni Daba nga dili siya supak apan iyang gihangyo nga kun mahimo didto na kini ipatuman sa sunod bulan sa Abril tungod kay premature ug wala pa masiguro ang category status sa syudad ug basin mausab pa ang level classification.

Hinoon, iyang gipasabot nga sama kaniya nga adunay problema sa kasingkasing dili gayud niya mahimong isugal ang iyang kinabuhi karong panahona apan iyang giklaro nga mosunod gihapon siya sa mauyunan sa kinabag-an sa Konseho.