Daba mipahalipay sa 410 graduates sa TSTI

“ANG tinuod nga kalampusan sa usa ka gradwado dili lang sa diploma, kon dili sa kausaban nga imong nahimo sa kinabuhi sa uban.”

Kini ang gibutyag ni Konsehal Suzette Magtajas-Daba, chairman sa komite sa edukasyon, atol sa gipahigayong 12th Commencement Exercises sa Technical Skills and Technology Institute (TSTI) sa panguna sa City College of Cagayan de Oro diha sa Centrio Mall.

Gipasabot ni Daba nga diha sa ilang pagkugi ug determinasyon nga makatapos sa ilang pagbansay-bansay, sila mibukas sa bag-ong mga pultahan dili lamang alang sa ilang kaugalingon kondi lakip na usab ang paghatag og maayong kaugmaon sa tagsa-tagsa nila ka pamilya.

Dugtong sa konsehal nga segurado ang maayong oportunidad sa panarbaho ang naghulat kanila human niining graduation.

Naglaom ang konsehal nga sa ilang naangkong kalamposan, magdala kini og dakong kontribusyon sa pagtukod og maayong kalamboan diha sa komunidad.  

Niini, si Konsehal Daba hugot nga mipahalipay sa 410 nga migradwar gikan sa lain-laing mga kurso nga lakip na SMAW NC1&2, Housekeeping NCII, Electrical Installation and Maintenance (EIM) NCII, Plumbing NCI ug Barangay Health Services (BHS) NCII. (RNQuiblat/SP/Photo grabbed from Councilor Daba's FB page)