top of page

Daba midayeg, mipahalipay sa mga magtutudlo

Akong dakong pagsaludo ug kusganong pahalipay sa tanang mga magtutudlo sa nasud ilabina dinhi sa dakbayan sa Cagayan de Oro.

Kini ang gipadayag ni Konsehal Suzette Magtajas-Daba, chairman sa komite sa edukasyon, sa pagsaulog sa National Teachers’ Day nga nagdala sa temang “Gurong Pilipino, Dangal ng Sambayanang Pilipino”.

Subay sa RA 10743, gideklara ang matag Oktubre 5 sa matag tuig nga Adlaw sa mga Magtutudlo sa tibouk nasud.

Tumong sa pagpasidungog nga maila ang kahalangdon ug dedikasyon sa mga magtutudlo sa pagtabang sa kabataan aron makab-ot ang ilang mga pangandoy.

Diha sa kasaulogan mabuhi ang imahe ug respeto sa pagtudlo isip usa ka bokasyon pinaagi sa pagdugang sa kahibalo sa publiko sa kabililhon sa mga magtutudlo sa katilingban.

Niini si Daba miingon nga gikinahanglan nga malantaw ang kamahinungdanon nga tahas sa mga magtutudlo nga nag-amuma sa kabataan sa pagpalambo sa ilang edukasyon kay dinhi mapalig-on ang pagkab-ot sa dugang kaarangan ug kalamboan sa komunidad ug sa nasud.

Ang inyong paggiya ug kaalam, dedikasyon mao ang magtultol kanamo sa hustong dalan nga mamahimong mas maayo ug mabungahong indibidwal sa pamilya ug sa katilingban. Kamo ang among bayani. Daghang salamat Teachers, pamahayag ni Konsehal Suzette Magtajas-Daba.


Comentários


bottom of page