Daba gikalipay ang katumanan pagtukod sa CDO City College

GIKALIPAY ni Konsehal Suzette Magtajas-Daba, Chairman sa Komite sa Edukasyon, ang katumanan sa pagtukod sa Cagayan de Oro City College.

Kini human giuyonan sa Konseho sa Syudad sa miaging sesyon nga gidumala ni Bise Mayor Bebot Rodriguez ang Resolusyon No. 14800-2024 nga nagsagop sa 2024-2029 City College Institutional Development Plan (IDP).

Matod ni Daba nga mahinungdanon kaayo ang maong IDP sa pag-abli sa kolehiyo karong tuig ting-tungha 2024-2025 ug usa kini sa mga rekisitos nga ma-ila sa Commission on Higher Education (CHED) subay sa Memorandum No. 18 series of 2022.

Niini, dako ang pagpasalamat ni Daba sa administrasyon ni Mayor Klarex Uy sa panglantaw nga mahatag ang serbisyo pagtunol sa dekalidad nga edukasyon ngadto sa kabataan sa tinguha nga mahatagan sila sa hayag nga kaugmaon.

Gipasalamatan usab ni Daba sa tanang sakop sa City College Governing Board sa paghatag og panahon, kolaborasyon, ug kontribusyon  dinha sa pagkab-ot sa gitinguhang implementasyon sa kolehiyo sa dakbayan.