Cugman Farmers Week gideklara

GIDAYEG ni Konsehal Jay Pascual, chairman sa komite sa agriculture, ang Konseho sa Barangay Cugman sa pag-ila sa mahinungdanong papel sa mga mag-uuma diha sa katilingban.

Kini human ang Konseho sa Syudad atol sa sesyon sa Lunes nga gidumala ni Presiding Officer Pro Tempore Konsehal Romeo V. Calizo misagop sa resolusyon nga nag-uli sa ordinansa sa Barangay Cugman nga nagdeklarar sa matag unang semana sa bulan sa Disyembre kada tuig nga pagatawgon isip Barangay Cugman Farmers Week.

Buot sa barangay nga pinaagi sa maong selebrasyon maila ang papel sa sektor sa mga mag-uuma ug magsiguro nga ang ilang pagpaningkamot adunay malungtaron nga kalamboan sa agrikultura diha sa barangay.

Tipik sa mga kalihokan atol sa maong selebrasyon mao ang pagpasundayag sa mga abot sa uma gikan sa mga organiko ug lokal nga pagpatubo, search for outstanding farmer, Garden sa Bakuran, farmers night, booth contest ug uban pa.

Niini, kusganong gidayeg ni Pascual ang maong selebrasyon kay usa kini ka paagi sa pagpasalamat ngadto sa mga mag-uuma.

Ang maong lakang miagi sa makuting pagtuon sa mga hintungdang buhatan sa City Hall.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (RNQuiblat/SP)