Cockfighting Law gihingusgang mapatuman sa hingpit

Si Konsehal Roger Abaday, chairman sa komite sa games and amusement, nangusog nga mapatuman sa hingpit ang mga patakaran ug regulasyon sa paghatag og panugot ug prankisa sa mga sabongan sa dakbayan.

Sa milabayng tigom sa komite, gipasabot ni Abaday nga ang dakbayan sa Cagayan de Oro aduna nay upat ka sabongan ug subay sa balaod, upat lamang ka prankisa ang gitugotan nga mag-operate.

Sa iyang pakisusi, ang balaod naglatid nga kun moabot og 100 mil ang populasyon sa usa ka lugar nga giaplayan sa prankisa mahimong makahatag og dugang prankisa ang lokal nga kagamhanan subay sa balaod ug subay sa pagpatuman sa mga rekisitos nga gisitar sa kagamhanan ug mga hintungdang ahensya.

Siya midugang nga gikinahanglan gyud ang sertipikasyon nga walay pagsupak ang barangay sa operasyon sa mga sabongan pinaagi sa pagpasiugda og public hearing alang sa applikasyon sa prankisa.

Niini, gihatagan sa komite ang mga aplikante pagsumite sa gikinahanglang mga dokumento ilabina ang development plan alang sa ilang tagsa-tagsa ka aplikasyon sa prankisa sa sabongan diha sa Sitio Maitum, Barangay Puerto ug Purok 5, Balubal sa tinguha nga mahatagan og panahon nga mahisgutan sa konseho.