COBI gihangyo mapadali ilang rehabilitasyon sa linya sa tubig

HINIUSANG giuyonan sa komite sa public utilities ni Konsehal Eric Salcedo nga magpadala og komunikasyon ngadto sa buhatan sa Cagayan de Oro Bulk Water Inc. (COBI) aron sa paghangyo nga mapadali ang pagtul-id sa ilang mga linya sa tubig sa tuyo nga dili taas ang panahon nga masinati  nga purisyo sa mga konsumidor.

Kini human gipahayag ni Marianito Barahan, technical advisor sa COBI, nga moabot sa kwarenta (40) ka adlaw ang ilang himoong rehabilitasyon sa mga linya sa tubig ug niini nga panahon, temporaryong mahunong ang ilang pag-suplay sa tubig ngadto sa Cagayan de Water District (COWD).

Nagtuo si Salcedo nga dako ang mahimong epekto niini sa katawhan lakip na sa negosyo tungod sa kakulangon sa suplay sa tubig hinungdan nga gihanyo niini ang mga opisyal sa COBI nga kon mahimo 24 oras ang ilang pagtrabaho aron mapadali ug mapaspasan ang maong repair works.

Nunot niini gihanyo ni Konsehal Salcedo ang mga opisyal sa COWD ug COBI nga tun-an pag-ayo ang maong sitwasyon aron masiguro ang supply sa tubig sa dakbayan. (MLR/SP)