Coastal, marine zones sa Cugman gitumbok

TUN-AN sa komite sa barangay affairs ni Konsehal Alam Lim ang gipalabang nga ordinansa sa barangay Cugman nga nagmugna sa ilang coastal ug marine zones.

Tinguha sa maong balaod nga matumbok ug maprotektahan ang kinaiyahan.

Lakip sa mga nailang conservation zone mao ang unom ka hektaryang marine protected area dinha sa Zone 5 ug Mangrove Area sa Zone 8 samtang gitumbok nga recreation areas ang mokabat sa duha ka hektaryang baybayon dinha sa Zone 3 ug Zone 1.

Dugang niini, gilatid sa ordinansa ang bahin sa Zone 8 ug Zone 1 nga dunggoanan sa mga sakayan samtang pipilaka bahin usab sa Zone 5 ug Zone ang giilang production zone kon fish aggregating device (FAD) ug production area.

Malaumon ang barangay nga kun mauyonan ang ordinansa maabagan sila sa lokal ug nasudnong kagamhanan aron mapatuman sa hingpit ang mga lakang nga gitagana dinha sa pagproteher sa kinaiyahan alang sa kaarangan sa kinabuhi dili lang sa kasamtangang katawhan kun dili sa umaabot pang mga henerasyon.