COA misugyot magamit pundo nga gigahin alang sa NGAs


KAPIN sa P95.65 milyones nga pundong gitagana sa kagamhanan sa dakbayan alang sa pagpatuman sa mga proyekto ug programa sa National Government Agencies (NGAs) ang gisugyot sa Commission on Audit (CoA) nga magamit na.


Kini ang usa sa mga rekomendasyon sa CoA nga nasulod sa giluwatang annual audit report sa dakbayan sa Cagayan de Oro alang sa tuig 2020 subay sa Batakang Balaod ug sa PD 1445 kon Government Auditing Code of the Philippines.


Sa maong report nga nadawat sa konseho sa syudad ubos ni bise mayor Kikang Uy, gibutyag nga ang maong fund transfers nga gigahin alang sa 16 ka mga proyekto ug programa nagpabiling wala magamit ug niini nahikawan ang mga targeted beneficiaries sa benepisyong makuha gikan sa nahisgotang mga programa ug proyekto.


Niini, ang CoA mirekomendar sa pagpahigayon sa gikinahanglang lakang aron magamit ang pundo sa pinaagi sa pagpatuman sa mga proyekto, programa ug uban pang kalihokan alang sa mga benepisaryo niini.


Dugang pa, gikinahanglan ang pagtambayayong sa maong mga NGAs ug sa dakbayan aron mamonitor ang paggamit sa nahisgotang pundo ug pagsumete gilayon sa monthly utilization report.


Ang nadawat nga audit report sa konseho giduso ni bise mayor Kikang Uy ngadto sa komite sa panalapi ni konsehal Edna Dahino alang sa kasayuran ug tukmang aksyon. (SP)