CLO gitahasang tun-an ang luna nga giokupahan sa BUPHA

TUN-AN karon sa buhatan sa City Legal ang sulat hangyo ni Bugo Punong Barangay Spencer Cailing.

Kini human nagtigom sa miaging semana ang komite sa urban and rural poor ni Konsehal Al Legaspi ug gituki ang hangyo sa Bugo Pioneers Homeowners Association (BUPHA) nga dili ipaubos sa demolisyon ang ilang mga balay samtang anaa sa proseso sa legalisasyon pinaagi sa buhatan sa City Housing and Urban Development Department (CHUDD).

Si PB Cailing mibutyag nga adunay kapin 7,500 ka membro ang BUPHA ug halos upat na ka dekada ang ilang pagpuyo, nakapundar sa dekantidad nga mga balay ug andam nga mobayad ngadto sa tag-iya sa luna.

Ang problema kay ang giingong mga tag-iya o manununod dili mokooperar sa proseso, matod ni Kapitan Cailing.

Ang representante sa buhatan sa City Legal mibutyag nga gikinahanglan gayud husayon una  kinsa ang tag-iya sa maong yuta aron makapadayon sa negosasyon.  

Niini gitahasan ni Konsehal Al Legaspi ang buhatan sa City Legal sa pagsubmite sa ilang rekomendasyon kabahin niini. (RNQ/SP)