CEO, RTA,CDRRMO, kontraktor gitahasan pag-inspeksyon sa traffic lights

GITAHASAN sa komite sa  public utilities sa konseho ubos ni  Konsehal Eric Salcedo ang City Engineering Office, Roads and Traffic Administration (RTA), CDRRMO ug kontraktor sa pagpahigayon og hiniusang  inspeksyon  sa tanang  traffic lights  sa tibook dakbayan.

Kini aron masuta kon unsay deperensya niini nganong  wala na  nag-andar gikan pa sa nanglabayng katuigan  ug hangtod  sa kasamtangan nga miresulta sa dako kaayo nga epekto sa problema sa dagan sa trapiko.

Mahinumduman nga si Konsehal Maximo Rodriguez III  sa  niaging sesyon sa konseho mitaho sa iyang namatikdan  nga wala na mogana ang  mga traffic lights nga  nakaamot  sa nagkagrabe nga kapiot sa dagan sa trapiko.

Sa maong tigom,  Si Engr. Vince Amora, project  engineer ug consultant  sa maong proyekto, miasoy nga na-award kanila ang  proyekto niadtong Marso 21, 2013 ug sa  ilang  pagturn-over niini, nag-function apan tungod sa gipahigayong road widening  ug pag-aspalto sa Department of Public Works and Highways (DPWH), naapektohan ang sistema niini hinungdan nga wala na kini  mag-andar ug wala na usab mamintinar sa syudad.

Hinoon si Amora mipadayag nga andam siya nga motabang  sa  pagpagana niini  aron masulbad ang labihan ka traffic sa syudad.

“E-priority nato ni kay problema  ang trapik,” pamahayag ni Salcedo.

Niini,  gihatagan  ni Salcedo og duha ka semanang tagal ang maong mga buhatan sa pagduso sa ilang rekomendasyon  aron kini mahisgutan sa komite ug maaksyonan. (JRG/SP)