CCTV sa kabarangayan kinahanglan tun-an pag-ayo -Cabanlas

“Dili basta-basta maka-demand sa tanang barangay nga magbutang gayud og kaugalingong Closed-Circuit Television (CCTV) kay dili man tanan maka gahom pagpalit niini.”

Kini ang reaksyon ni Konsehal Edgar Cabanlas, majority floor leader sa konseho sa taho ni Konsehal Roger Abaday atol sa sesyon niadtong Lunes nga gidumala ni Bise Mayor Bebot Rodriguez, nga ang tanang barangay sa syudad mag-instalar og CCTV camera aron daling maila ug masolosyonan ang mga krimen sa dakbayan.

Maayo man ang sugyot ni Konsehal Abaday apan gikinahanglan niini ang koordinasyon sa syudad aron maoy magbutang og control center kay diha mausa ra ang tanang makita sa CCTV ug paspas ang pagkuha sa tanang impormasyon.  

Gani adunay balaod ang syudad nga nagmando sa tanang komersyal nga establisemento nga magbutang og kaugalingong CCTV isip usa sa requirements sa paglukat o’ pag-renew sa ilang business permit.

Niini kusganong gisugyot ni Cabanlas nga mahisgotan sa komite sa public order and safety ubos ni Konsehal Roger Abaday ug sa komite sa barangay affairs ni Konsehal Marlo Tabac ang maong sugyot ilabina ang kabahin sa pagpahamtang og multa sa kabarangayan nga dili makabutang og CCTV. (RNQ/SP)