top of page

Calizo nalipay sa pagsulod sa GrabCar sa Cag de Oro

Dako ang pasalamat ni Konsehal Romeo Calizo, chairman sa komite sa public utilities and transportation, sa tinguha sa Grab Philippines nga mag-operate og GrabCar dinhi sa syudad.

Tima-an kini nga hinayhinay nang nag-upgrade ang transportasyon sa dakbayan ngadto sa modernisasyon. Apan kinahanglang balansihon pag-ayo ang tanan nga walay maapektuhan ug ma-agrabyado, sumpay sa konsehal.

Matod niya nga dako og matabang sa seguridad sa mga pasahero nga mahatod gyud sa tugkaran ingon man nga pamaagi nga dali ang pag-kontak panahon sa panginahanglan tungod sa mga bag-ong teknolohiya nga gigamit sa GrabCar kun itandi sa mga kasamtangang taxi.

Hinuon, si Calizo mingon nga kinahanglan ang dugang pagtuon aron dili usab ma-apektuhan ang mga taxi operators ug pangitaan sa pamaagi nga mabalanse ang tanan ug walay maagrabyado.

Niini, gihangyo ni Calizo nga mahatagan ang komite sa higayon nga matun-an pag-ayo ang aplikasyon sa Mindanao Grab Philippines pinaagi sa pagsunod sa tanang mga proceso nga makabenepisyo ang tanang hut-ong sa katilingban. (MLRapanot/SP)

Konseho midayeg sa mayor sa gitunol nga patrol cars

Hugot nga gidayeg sa konseho sa syudad ubos ni Bise Mayor Bebot Rodriguez si Mayor Klarex Uy sa pagpalit ug pagtunol sa mga patrol cars alang sa tanang police precincts sa Cagayan de Oro City Police Office (COCPO).

Kini ang unod sa resolosyon nga gipangamahanan sa bise mayor ug gisagop sa konseho sa sesyon kagahapon.

Mahinumduman nga sa milabayng bulan, gitunol sa mayor ang napulo ka patrol car ug walo ka police roving motorcycle sa tinguha nga mapalapdan ang kampanya sa kwerpo sa kapolisan dinha sa pagpatunhay sa kahusay ug kalinaw.

Giingon nga dako na kaayong tabang sa operasyon sa kapolisan ang dugang mga sakyanan aron mas mapadali pa ang pagresponde sa sa tawag sa emerhensya ug mapakusgan pa ang police visibility sa bisan asang dapit sa dakbayan. (JNortiza/SP)


Comentarios


bottom of page