top of page

Calizo mihangyo’g pagsabot sa problema sa trapiko dihas Masterson Avenue


HUGOT nga gihangyo ni Konsehal Romeo Calizo, Chairman sa Komite sa Public Utilities, ang gamayng pagsabot sa katawhan sa nasinateng problema sa trapiko dinha sa Masterson Avenue sa uptown area.

Kini ang pamahayag ni Calizo atol sa milabayng tigom sa iyang komite sa gipadangat sa Federation of Uptown Village Homeowners Association nga unta masolusyonan ang kapiot nga dagan sa trapiko matag adlaw.


Sumala sa konsehal nga gitinguha na nga mapangitaan og solusyon ang problema sa trapiko ug samtang gipanday ang mga gikinahanglang lakang, unta masabot sa katawhan ang problema.


Niini, siya mihangyo sa makanunayong pag-abag sa konseho sa Barangay Canitoan pinaagi sa pagdestino og mga sakop sa Barangay Police nga makatimbang sa mga sakop sa Roads and Traffic Administration (RTA) dinha sa pagdumala sa trapiko.

Ang komite ni Calizo gipaabot nga magpahigayon og dugang tigom uban sa kadagkoan sa Pueblo de Oro Township, Xavier University ug Corpus Christi School nga apektado sa maong problema sa trapiko aron makuha ilang mga panahum.

bottom of page