Calizo miawhag sa mga operators, drivers pagsumete sa Pantawid Pasada requirements

ARON makadawat sa fuel subsidy gikan sa nasudnong kagamhanan, si Konsehal Romeo Calizo, chairman sa komite sa public utilities, nanawagan sa mga operators ug drivers sa mga pampublikong sakyanan pagsumete sa gikinahanglang rekisitos aron makapahimulos sa Pantawid Pasada Program.

Kini human ang iyang komite nagtigom sa milabayng adlaw aron mapaabot ngadto sa lain laing kapunungan sa mga drivers ug operators sa mga public utility vehicles (PUVs) ang gipahigayong mga lakang sa LTFRB sa panguna ni regional director Aminoden Guro dinha sa pagpatuman sa programa.

Nasayran gikan ni Director Guro nga nagpadayon na ang pag-apod apod sa fuel cards ngadto sa mga kwalipikadong benepisaryo dinhi sa rehiyon ilabina sa mga nag-operate og mga jeep ug bus.

Hinuon, gitin-aw sa direktor nga sa kasamtangan padayon pa ang ilang pagdawat sa mga rekisitos sa mga nag-operate og taxi. Matod niya nga adunay 2,399 ka units sa taxi ang gipaabot nga makapahimulos sa programa.

Dugang pa, si Guro mipahimangnu sa mga benepisaryo nga ang fuel cards magamit lang sa pagpalit og gasolina ug krudo ug dili sa ubang butang. Kun gamiton sa pagpalit sa lain mahimong ma-disqualify ang usa ka benepisaryo sa programa ug dili na malakip sa umaabot pang mga ayuda.

Niini, si Konsehal Calizo mapasalamaton ni Director Guro sa pag-abag sa katawhan sa dakbayan ilabina sa mga drivers ug operators sa pampublikong sakyanan nga makapahimulos sa gihan-ay nga mga programa sa gobyerno. (SP/JNortiza)