Cabanlas supak sa planong pagbalhin sa XU diha sa Manresa

Naghangyo si Konsehal Edgar Cabanlas, chairman sa komite Urban and Rural Poor and Housing Development, sa mga kadagkuan sa Xavier University nga mareview ug tun-an pag-ayo ang pagbalhin sa Xavier University campus nga kasamtangang nahimutang sa dalang Corrales ngadto sa Manresa Heights.

Kini ang reaksyon ni Cabanlas sa gipadangat nga special report ni Konsehal Ian Mark Nacaya mahitungod sa nasangpit nga isyu.

Sumala ni Cabanlas nga wala siyay pagsupak kun ang kalambuan sa tunghaan ang katuyoan sa maong pagbalhin apan kinahanglan gihapong balansihon ug konsiderahon ang aspeto sa cultural heritage sa maong unibersidad.

Naglaum si Cabanlas nga paminawon sa mga opisyal sa Xavier University ang hangyo ug panawagan sa mga stakeholders ingon man sa mga estudyante ug ilang mapasabot ang rason sa pagbalhin niini.

Nunot niini suportado ni Cabanlas ang gisagop nga resolosyon nga nanawagan sa Superior General sa Society of Jesus sa Rome, mga kadagkuan sa Ateneo de Cagayan ug sa mga myembro sa Board of Trustees niini nga subling mopahigyon sa laing hugna sa deliberasyon uban sa mga stakeholders.