Cabanlas nangusog mapalig-on housing program sa syudad

GIHINGUSGAN ni Konsehal Edgar Cabanlas, chairman sa komite sa urban and rural poor and housing development, nga mapalig-on ang programa sa socialized housing ug matubag ang panginahanglan sa mga kabus.

Ang konsehal subling mihangyo sa Task Force for the Emancipation of Piso-Piso Beneficiaries ug City Housing and Urban Development Department nga sutaon pag-ayo kun angayan bang tabangan ug kun mopasar ba sa gisitar nga rekisitos sa gobyerno ang matod pa mga benepisaryo ang wala pa nahiluna ug wala pa naka-angkon sa kaugalingong lote.

Ang konsehal mibutyag nga gustong niyang paspasan ang pagtunol sa mga lote ngadto sa angayang tabangan kay mao usab kini ang hangyo ug mando ni Mayor Klarex Uy nga mapahiluna ang mga illegal settlers sa syudad.

Dako iyang paglaum nga mahan-ay pag-ayo ang himoong economic survey ug profiling sa mga benepisaryo aron mapadali ang pagbalhin ug pagpahiluna sa mga kabus nga katawhan.