Cabanlas nagpasalamat sa pamilyang Floirendo

KINASINGKASING nga gipasalamatan ni Konsehal Edgar Cabanlas, chairman sa komite sa urban and rural poor and housing development, ang pamilyang Floirendo nga tag-iya sa loteng giokupahan sa 160 ka pamilya nga nanimuyo diha sa Hilltop sa barangay Macasandig.

Kini human nasayran ni Cabanlas atol sa milabayng tigom sa komite nga wala modawat sa renta sa lote ang pamilyang Floirendo gikan sa mga molopyo ug wala usab kiniy laraw sa pagpapahawa samtang wala pa nila gamita ang lote.

Mahinumduman nga misulat ug mihangyo ang mga residente sa komite nga malakip sa housing program sa gobyerno ang dapit pinaagi sa on site resettlement program tungod sa ilang kadugayon sa pagpanimuyo sa dapit.

Niini, si Reynaldo Floirendo, tag-iya sa lote, mibutyag nga gitugotan nila sa pagkakaron ang mga molopyo alang sa humanitarian consideration ug kabahin sa hanyag nga paliton ang maong lote hisgutan pa kini sa ilang pamilya.

Nunot niini, dako ang pasalamat ni Cabanlas sa paghatag og konsiderasyon sa mga molopyo ug malaumon nga hingpit kining mapatuman sa umaabot nga panahon.