Cabanlas misugyot dapiton sunod sesyon ang CSWD, DSWD ug uban pa

SA tinguha nga mahatagan ug katin-awan ang mga pangutana kabahin sa pagpang apod-apod sa special ayuda sa syudad, gisugyot ni Konsehal Edgar Cabanlas nga dapiton sa sunod sesyon ang mga hintungdan opisina sa goberno nga naglangkob sa City Social Welfare Department, Department of Social Welfare Development (DSWD), Acting City Administrator Teddy Sabuga-a ug uban pa nga maoy gitahasan ug nasayod sa distribusyon sa special ayuda.

Kini ang reaksyon ni Cabanlas sa gipadangat nga special report ni Konsehal Lordan Suan atol sa sesyon niadtong Lunes nga gidumala ni Bise Mayor Kikang Uy kabahin sa isyu sa unclaimed ayuda.

Dili lang unta nato pangunahan nga diin adunay katahap nga adunay kapalpakan o pagpakabaya kay wala paman nato napaminaw ang pamahayag gikan sa mga kadagkoan sa CSWD busa kalma lang ta, sumpay ni Cabanlas.

Samtang gipasalamatan ni Konsehal Cabanlas ang mga kawani sa City Hall nga misanong sa panawagan ug maoy boluntaryong mi apod-apod sa ayuda taliwala sa risgo nga ilang giatubang.