Cabanlas misugyot dapiton organizer sa Miss Cagayan de Oro 2022

SI Konsehal Edgar Cabanlas, chairman sa komite sa urban and rural poor and housing development, naguol sa gitunol nga premyo ngadto sa mga napiling Miss Cagayan de Oro ug consolation prize sa mga kandidata niini.

Gamay ra kini kun itandi sa ilang kahago, pamahayag sa konsehal.

Niini, gusto usab sa konsehal masayran alang sa kahibalo sa katawhan ang kinatibuk-ang na solicit sa organizer aron dayag ang mga gihimong transaksyon.

Ang maong panawagan ni Cabanlas alayon sa special report ni Konsehal Jay Pascual atol sa sesyon sa konseho niadtong Lunes nga gidumala ni Bise Mayor Bebot Rodriguez.

Dugang namatikdan sa konsehal nga nakadaot sa kinatibuk-ang programa sa pageant mao ang pagharana sa mga singer ngadto sa mga kandidata nga medyo sintonado diin gituhu-an nga unta mga first class performers tungod kay first class city man sa nasud ug usa sa labing dako nga syudad ang Cagayan de Oro.

Gusto ko lang mainsakto ang akong nakitang sayop aron dili na kini mahitabo sa sunod nga higayon kay ma-apektuhan ang tanan lakip ang konseho sa dakbayan, sumpay ni Cabanlas.

Niini, iyang gisugyot ang pagpatawag ug pagdapit sa komite sa turismo ni Konsehal Pascual ang organizer sa pageant aron matubag ang ilang mga pangutana. (SP/MLRapanot)