top of page

Cabanlas misugyot amendahan Traffic Law

Gisugyot ni Konsehal Edgar Cabanlas, chairman sa komite sa urban and rural poor and housing development, nga ma-amendahan ang ordinansa sa trapiko sa syudad ug tun-an ang mga probisyon sa balaod nga ang tanang multa sa trapiko mahimong makonsidera na lang nga administrative fines.

Kini ang reaksyon ni Cabanlas sa taho ni Konsehal Joey Abbu atol sa sesyon sa konseho niadtong Lunes nga gidumala ni Bise Mayor Bebot Rodriguez sa tinguha nga makapahimulos ang usa ka traffic violator sa nahilatid sa Probation Law.

Sumala ni Cabanlas nga maayo ang tinguha ni Abbu nga mosagop og resolosyon nga maghangyo sa mga kongresista sa syudad kalabot niini nga isyu apan basin og madugay pa kini sa pagtuki sa kongreso hinungdan nga iyang gisugyot nga amendahan na lang ang ordinansa aron mapadali.

Dugang pa sa konsehal nga luoy ang driver nga dili makagahum pagbayad sa iyang multa tungod sa kadako na sa iyang bayronon ug makaangkon na gilayon kini og criminal record sa korte nga posibleng mahimong maka-apekto sa iyang tinguha sa pag-apply og trabaho.

Nunot niini, malaumon si Cabanlas nga maduso kini sa komite sa pamalaod aron tun-an pag-ayo ang mga pribilihiyo nga nahilatid sa balaod.



Comments


bottom of page