Cabanlas mipaimbestiga sa giingong anomaliya sa CHUDD

Gisugyot ni Konsehal Edgar Cabanlas, chairman sa komite sa urban and rural poor and housing development, nga maumol ang bag-ong ordinansa nga magpalapad sa tahas sa opisina sa City Housing and Urban Development Department aron matumbok ang kakulangon sa kasamtangang balaod.

Kini human gibutyag sa konsehal ang giingong kalambigitan sa pipila ka mga kawani sa opisina sa mga anomaliya dinha sa pag-apod apod sa mga lote ug housing units sa relocation sites sa dakbayan. Sa iyang special report sa sesyon sa konseho niadtong Lunes nga gidumala ni Bise Mayor Jocelyn Bebot Rodriguez, gipasabot nga wala makatumbok sa tukmang tahas ang ordinansa hinungdan nga walay insaktong gabayan ang opisina sa CHUDD unsaon pag apod-apod sa mga balay ug yuta ug unsaon pagpahawa kun dili kini kwalipikado.

Buot sa konsehal nga makorehian ang sayop aron mahimong praktikal, simple ug epektibo ang balaod. Alayon sa maong isyu gihangyo sa konsehal ang temporaryong pagpahunong sa pagpanghatag sa Entry Pass aron mahatagan sa igong panahon ang nagpadayong imbestigasyon sa buhatan sa ehekutibo, samtang gisugyot usab niini ang paghimo og parallel investigation sa konseho.

Ang taho ni Cabanlas giduso ni Bise Mayor Bebot Rodriguez ngadto sa komite sa urban poor alang sa pagpahigayon og imbestigasyon nga magamit sa pagpanday sa gikinahanglang ordinansa.