Cabanlas dismayado sa hinay nga supply sa tubig sa syudad

DAKO ang pagtuo ni Konsehal Edgar Cabanlas nga usa sa hinungdan nganong gakawala o’ hinay ang supply sa tubig sa syudad mao ang nagpadayon nga pagtukod og mga cellsite tower nga diin sa pagkalot sa yuta adunay mga nanga-igo nga water pipes sa Cagayan de Oro Water District (COWD) nga gipasagdan lang.

Kini ang unod sa special report ni Cabanlas atol sa sesyon ni-adtong Lunes nga gidumala ni Bise Mayor Kikang Uy.

Sumala ni Cabanlas nga wala siyay pagsupak sa pagsulod sa mga negosyo sa syudad susama niining pagtukod og mga cellsite sa mga telecommunication companies.

Gani modapit pa kita sa pagbubo sa ilang negosyo kay dugang kinita-an kini sa syudad gawas nga daghan pa ang matabangan sa pagpangimpleyo apan kinahanlan tumanon ang mga gabayan sa balaod, matod ni Konsehal Cabanlas.

Dugang niini, gikadismaya ni Cabanlas ang pagpa sagad sa pipila ka kontraktor sa mga cellsite tower nga maoy hinungdan sa pagkawala sa supply sa tubig diin apektado niini ang mga residente sa pipila ka bahin sa barangay Gusa, Patag, Agusan ug barangay Cugman ug tungod niini gisugyot ni Konsehal Cabanlas nga mapatawag sa konseho ang mga kontraktor niini aron makoha mapatubag sa nasangpit nga panghitabo.

Nunot ang maong report ni Cabanlas giduso ni Bise Mayor Uy ngadto komite sa Public Utilities ni Konsehal Teodulfo Lao Jr. alang sa tukmang aksyon ug rekomendasyon.