Brgy. Bonbon mapatuman na dugang programa ug proyekto

MAHIMO nang ipatuman sa Barangay Bonbon ang ilang mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2026 Annual Budget nga adunay gibanabanang kinitaan ug galastohon balor P17,174,736.00.

Lakip sa gipundohan mao ang mga programa ug proyekto sa Sangguniang Kabataan balor P1,717,474,00; P1,800,000.00 usab ang gigahin alang sa pagpalit og bag-ong dump truck diin makatabang sa pagkolekta sa mga basura sa barangay ug uban pang katuyoan nga maghatag serbisyo ngadto sa katawhan; P765,947.00 alang sa declogging sa canal; P80,000.00 usab ang gigahin alang sa pag-improbar sa ilang Day Care Center ug uban pang mga programa nga maghatag dugang kaarangan sa ilang barangay.

Ang 2026 annual budget sa Barangay Bonbon miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (MLR/SP)